هل أصبحت الكلاب بهذه الأهمية فعلا؟؟

بسم الله الرحمن الرحيم

فى البداية انا كان نفسي أكتب الموضوع ده باللغة العربية الفصحى بس للأسف لاقيت ان ماينفعش غير انه يتكتب بالعامية الفضحى ...
المهم نيجي للموضوع.

طبعا كلنا سمعنا عن الكلب.... حيوان مزعج فى كل الشوارع المصرية و متلقح فى صفافيح الزبالة ويقرف فينا بهوهوته و احنا نايمين بالليل .. أكيد كلنا عارفين الكلب و سمعنا عنه .
واكيد سمهنا عن داء الكلب و اكيد برضو سمعنا عن مصل الكلب اللى بيعالج مرض الكلب اللى احنا سمعنا عنه و أكيد سمعنا عن مستشفى الكلب المتخصصة فى علاج داء الكلب ..
أكيد كمان كلنا سمعنا عن ابن الكلب الشتيمة الاشهر فى ألسنة الشعوب ... تقريبا دى اهم الكلمات المتعلقة بقاموس الكلب اللى انا و كتير من حضراتكم سمع عنها الا انى فى الفترة الاخيرة وانا فى محل مترو انضافلى كلمة جديدة للقاموس و هى القسم الخاص بغذاء الكلب وساعتها كنت حاسس انى رجعى اوى ومتخلف طبعا لأن الكلام ده موجود من زمان بس انا اللى جاهل و الاكيد ان كلكم دلوقتى سمعته عنه ..
لكن الكلمة اللى انضافتلى امبارح فى قاموس الكلب دي كلمة جديدة لانج .. كلمة ماعتقدش ان حد فيكم سمع عنها و لا حد فيكم تخيل بان فى حاجة اسمها فندق الكلب ... آه فندق الكلب ماتتخضوش .. فندق خاص للكلاب بريسيبشن و غرف و سويتات و حمامات سباحة و الفندق فايف ستارز يعنى 5 نجوم و موجود فين بقى ؟؟؟
لا يا عم امريكا ايه و اوربا ايه ... ده موجود فى محافظة الجيزة بجمهورية مصر العالمية ..
ده مش كلامى ده كلام سمعته فى برنامج امبارح على قناة دبي

المشكلة الألذ ايه بقى ؟؟
ان القناة عملت لقاءات فى الشارع المصري وتباينت ردود الأفعال من اللى اندهش و اللى اتبسط و اللى كان هايتف فى وش المذيع (سورى يعنى) و اللى كان حاسس بظلم للكلب ان الخطوة دى اتأخرت كتير ..
لالالالا ده فى مشكلة ألذ بكتير وهى ان فى سؤال اتسأل للناس وهو هل تقبل انك تشتغل فى الفندق ده ؟؟؟
هاسمعكم عينة من الردود :
* لا طبعا ايه الهبل ده ؟
* آه طبعا ده حتى الشغل مع الكلاب احسن من البنى آدمين
* على حسب المرتب الأول
* لا صعب افرضى الكلب انا زعلته يهبش فيا يعنى ؟؟
* انا ممكن أشتغل فى الريسيبشن بس
*واحد زعلان اوى عشان مافيش غرف لملاك أو أصحاب الكلاب دى

دى الردود اللى انا فاكرها و أعتقد انها معبرة عن حالة فئة فى شعب مصر عايشين فى عالم تانى ...
هو وصل بينا الحال لكده ؟؟ ولا الكلاب فعلا بقت مهمة اوى وانا مش واخد بالى ؟؟؟ ولا يمكن دى فلوس زيادة عن الحد لدرجة انى امتع كلبى و انيمه فى فندق خمس نجوم فى الوقت اللى آلاف من شعبى مش لايقين خيمة تآويهم من حر الصيف ولا من برد الشتاء ..

يا جماعة انا هاقول مش مصدق الناس اللى فى التليفزيون يمكن متأجرينهم عشان يقولوا الكلمتين دول بس الفندق موجود فعلا و انا عايزكم تتخيلوا نفسكم فى البرنامج ده وسمعت بالفندق ده ياترى رد فعلك هايكون ايه ؟؟
المشكلة اننا معظمنا من الطبقة المتوسطة ياريت كان حد معانا من الطبقة الارستقراطية عشان نعرف رأيه يمكن الموضوع ده بالنسبة لهم عادى ..

أنا آسف للإطالة بس أعتقد ان الموضوع جدير بالنقاش بس قبل ماقفل عايز اعرف رأيكم فى حاجة جت على بالى دلوقتى .
لو انت رجل اعمال ناجح جدا او سيدة اعمال طبعا و اتعرض عليك فكرة مشروع زى ده هايكسبك دهب أكيد ... هل بصراحة هاتوافق على التنفيذ وتقول انا مالى دى عالم هبلة وهايدفعوا وانا الكسبان ؟؟؟ ولا ايه رأيكم ..

توبيك جميل
تسلم ايديك

دياسطي

انت مختارتش غير محافظتى الجيزة
المهم
فعلا انت عندك حق بس ماتنساش ان ربنا امرنا بالرفق بالحيوان وكمان ماتنساش ان الفندق ده مشغل ناس وفاتح بيوتهم
وبالنسبة لسؤالك انا لو سيده اعمال هرفض

[size=29]بس يا سومه مش لدرجه ان هما يعملمهم فنادق وفى ناس مش لاقيه مكان تنام فيه[/size]

» هل الحب هو حب فعلا ام هو مجرد وهم؟؟؟؟